هوى اصحابى
الحمد لله اخيرا وصلنا بلدنا بعد معاناه طويله ورحله شاقه جدا
اول ما خرجنا من المحطه شوفنا عربيات مش عارف دى عجلة ولا موتوسيكل ولا ايه
حسونه قال دا التكتك يا بكار وهيوصلنا جوه القريه ويروحنا بسرعه تعالو نركبه ونروح
وافقنا على فكرة حسونه بس طبعا اتقسمنا كل اتنين فى تكتك لانه صغير ميشلش اكتر من كده
وطبعا رشيده كانت معايا وكمان حسونه
الغريب ان السواق كان واضح ان سنه صغير ميزدش عن 15 سنه
وكان بيسوق بسرعه رغم ان الطريق مليان مطبات
ياكابتن ممكن تسوق بالراحه شويه.... انت داخل سبق
فى ايه بس الحق عليا انى هوصلكوا بسرعه قبل زمايلكو عشان تبقوا تغيظوهم
وشويه والسواق هدى السرعه بس مش بسبب كلامنا هو هدى عشان يعاكس البنت اللى ماشيه على جنب الطريق
احب الشيكولاته...حلاوتك يا شيكابالا...بس لو مكانتش البطاطا اتحرقت
انت يا محترم ممكن تبص قدامك وتحترم اللى معاك شويه
انت شكلك مش هتريح معايا ..انزل يا امور شوفلك تاكس
طبعا هننزل بس يكون فى علمك احنا مش هنسكت وهنشتكيك لادارة المرور وهيسحبوا منك الترخيص
هههههههه ...طب انزل بقه وشوفلك اى فيل يوصلك
يلا يا حسونه
ونزلنا من التكتك واول حاجه عملتها انى بصيت على النمر عشان ابلغ عنه
لكن ياخبر دا مفيش نمر
طبعا ياعم بكار ما انت لو بتقرا جرايد او بتتفرج على البيت بيتك كنت هتعرف ان التكتك لا له ترخيص ولا نمر
يعنى ايه يعنى ممكن يعمل اى جريمه ومحدش يقدر يعاقبه
انا عارف انا ليه ركبت معاك انت يا بكار مالها زينه ولا همام زمانهم وصلوا
احنا عندنا مبادئ ياحسونه مش ممكن نسكت على الغلط ابدا افرض البنت دى كانت اختك
ال مبادئ ال طب خلى المبادئ توصلنا بقه
وقتها جه ولد سايق عجلته وقالنا الحقوا الاتنين اللى كانوا معاكوا
طلعوهم من الترعه القديمه اللى على اول البلد
جرينا بسرعه نشوف فيه ايه والحمد لله ان ربنا نجاهم من الحادثه
لكن زينا كانت زعلانه وبتبكى بحرقه
مالك يازينه
اص...اص...اص
خير فيكى حاجه..حاسه بالم
لا
طب حاجتك جرى لها حاجه
لا الحاجه موقعتش اصلا الحمد لله
امال مالك فيه ايه
اص...اص..اص
تانى اتكلمى وقعتى قلبى
الفانوس اللى اشتريته من مصر اتكسر منى
معقول يا زينه كل ده عشان الفانوس
الحمد لله ان قرعتى وقعت مع بكار ...اه.. قضا اخف من قضا....على الاقل فانوسى سليم مش زى زينه
8/21/2007, 12:28 pm
