السلام عليكم ورحمه الله وبركاته
انا عايزه اطرح موضوع مهم جدا , وياريت تشاركوني برأيكوا...
الموضوع بخصوص مسجد الوحده واللي بيحصل فيه للاسف كل يوم...
المشكله هي انه في الدور المخصص للسيدات في المسجد , كل يوم بتحصل مشاحنات وخناقات من العامله المسؤله عن المسجد ... المشكله انها بتبقي علي حاجات هايفه جدا ... وممكن من غير سبب كمان , وتقعد تزعق وتعلي صوتها بشكل غريب ... ولو بنت قالتلها غلط كده احنا في الجامع , بتزعق فيها اكتر وتقولها هو انا قلتلك احنا في الكنيسه!!!
بصراحه .. الوضع ده احنا اتعودنا عليه خلاص!!! وبقينا بناخدها علي اد عقلها , وماحدش بيعلق علي الزعيق بتاعها كل يوم ..وبقينا نقول خلاص دي ست كبيره , و ممكن يكون عندها مشكله نفسيه وربنا يسامحها ...
الجديد بأه ... اني اكتشفت النهارده انها مش الوحيده اللي بتتخانق في الجامع ... لأ دي مظاهره !!!
النهارده بعد درس دكتور مندوه , رحت اصلي العصر في مسجد الوحده , وبعد الانتهاء من الصلاه مباشره... اتفاجأت بواحده من اللي كانوا بيصلوا معانا , بتزعق وتقول مين اللي فتح المروحه دي ... فواحده ردت عليها قالتلها انا ... فالست الاولي ردت عليها وقالتلها روحي مكان تاني , احنا هنا عيانين ومش بنفتح المروحه , عقبالك زينا يارب!!!
طبعا التانيه ردت عليها , والحكايه قلبت بخناقه جامده جدا... حسيت كأننا في الشارع مش في المسجد !!
طبعا انا وقفت مذهوله من اللي بيحصل وكنت همشي , لكن لفت نظري ان المسأله تطورت وبدأوا باستخدام الفاظ وحشه جدا وشتيمه ...
حاولت اكلمهم , واقولهم يا جماعه عيب كده احنا في المسجد ... لكن بدوه فايده ... وفي النهايه مشيت من المسجد والخناقه لسه شغاله وانا مذهوله مش عارفه اعمل ايه!!!
هدفي من طرح الموضوع حاجتين ...
اولا ... لو حد عنده رأي , ويقدر يقول ايه التصرف الصحيح اللي ممكن نعمله عشان نمنع الحكايه دي اللي بتتكرر كل يوم ...
ثانيا ... ياريت حد من الولاد يوصل صوتنا لشيخ المسجد , ويحكيله علي اللي بيحصل يمكن يلاقي حل ...
او حتي يقفل الدور ده خالص ... انا عارفه ان قفل الدور ده هيبقي حل صعب جدا , لانه اقرب مكان للصلاه بالنسبه للبنات ... لكن في رأيي انه احسن من ان بيت من بيوت ربنا يتحول لسوق , وبدل مايكون مكان تحفنا فيه الملائكه , يبقي مأوي للشياطين ..
جزاكم الله خيرا , واسفه للاطاله
6/27/2007, 7:43 pm
